A cchiù ‘e nu juorno d’ ‘o bbalcone
vedevo na zengarella a nnu puntone.
Na matina scenno e mm’accosto vicino
mettenno ‘a mano dint’ ‘o bburzellino.
‘A zengarella me guarda e mme dice:
-Astipate ‘sti solde, ca Ddio te bbenedice.
Io t’aspettavo pecchè Chi me manna
vo’ fa sape’ ca se pripara na cundanna.
Tu ca tiene ancora nu poco ‘e core
ssi’ ll’unico ca po’ ccapi’ tutto ‘o dulore.
‘O Pataterno, ca vulesse sulo ‘a pace,
vedenno Napule nguaiata sse dispiace.
Ddio ha fatto ‘sta città cu tant’ ammore
accunciannola cu ppacienza e ccu sudore.
Ce ha miso ‘o Vommero, Capemonte,
Pusilleco, Mergellina e ‘o sole nfronte.
Ll’ ha dato ‘o tiempo bbuono, bellu mare
e ‘a luna ca se cunfonne cu ‘e llampare.
Ce ha fatto nascere tanta bbella ggente,
musica, canzone, alleria e ssentimento.
Ma ‘sta città affoga int’ ‘a munnezza
e sta perdenno ll’ammore e ll’allerezza.
Tutto pecchè essa è mmale guvernata
e ttanta malagente ‘a téne ncatenata.
Chillo nun ce ‘a fa a vvede’ Napule accussì.
E ppe nun continua’ a chiagnere e ssuffri’
‘a vo’ distruggere sotto a n’ eruzzione!-
E dicenno “Fujte!” sparette bell’ e bbuono.
Fausto Marseglia
